Hulduland

Góður vinur

2010-08-08T13:03:00.001Z

Það er góður vinur sem hringir klukkan átta á sunnudagsmorgni og til að láta vita að hún sé vöknuð og búin að búa til pláss fyrir þig við skrifborðið sitt.

So you can dance with me baby!

2010-08-04T08:18:00.001Z

Fátt er betra en morgunverðar-diskó.

Föstudagskvöld

2010-06-18T19:55:00.003Z

Sit og keyri módel á tölvuni og fylgist með brúðkaupstónleikunum í sjónvarpinu.

Hátíð í bæ

2010-06-17T14:24:00.004Z

Við byrjuðum daginn með því að veifa fánanum og syngja Öxar við ána og töluðum um að lýðveldið Ísland ætti afmæli. 66 ára er lýðveldið orðið... höldum við. Fáninn fékk að fara með á leikskólann í morgun og á heimleiðinni verður keypt pítsa.

Eftirrétturinn er svo sérinnfluttur frá Íslandi: rammíslenskt Prins Póló frá Póllandi með mjólk.

Svefnvenjur

2010-06-16T09:08:00.004Z

Síðan Íris fæddist hef ég átt erfitt með að sofa á næturnar. Fyrstu árin var hún alltaf lasin og það var ekki fyrr en núna eftir jól sem barnið fór að sofa heilar nætur. En þá var líkaminn minn hættur að vonast eftir svefni og fyrst í vor gat ég lagst á koddann á kvöldin og slakað á og næstum alltaf reiknað með því að ekki þurfa að vakna fyrir klukkan hálfsjö.

Núorðið get ég sofið. En ég má ekki við miklu. Ég fer á taugum af tilhugsuninni um vekjaraklukku svo ég vakna sjálf klukkan sjö. Þar að auki er ég næstum alltaf komin upp í rúm klukkan ellefu til að tryggja að ég fái að sofa sem lengst ef ske kynni að hennar hátign skildi dreyma illa og vakna um miðja nótt.

Í gær var ég á fótum til tvö að vinna að verkefninu. Getið hver vaknaði klukkan hálfsex og hélt því fram að kominn væri dagur!

Ömmudagur í dag

2010-06-13T09:25:00.002Z

Mér skilst að á Íslandi sé ömmudagur. Mér finnst þetta flott framtak og óska ömmum landsins hjartanlega til hamingju!

Amma í Gljúfraseli, amma Dúdda og mamma: til hamingju með daginn!

Til hamingju!

2010-06-12T11:25:00.003Z

Í dag útskrifast margt gott fólk úr Háskólanum. Til hamingju!

Stundum reynast einfaldir hlutir flóknir...

2010-06-11T19:49:00.001Z

Fór á bókasafnið í dag. Sat í fimm tíma í blautum skóm og sokkum áður en mér hugkvæmdist að fara úr sokkunum og lesa berfætt.

Þunn

2010-06-09T12:50:00.003Z

Var með höfuðverk í gær og tók sterka verkjatöflu. Svo kom fólk í heimsókn og vinkona mín kom með kampavín til að skála fyrir góðum fréttum. Þá var ég búin að gleyma höfuðverknum og skálaði með glöðu geði. Eftir heilt kampavínsglas var ég orðin aðal pæjan í partíinu. Stóð á haus og steypti mér í kollhnísa og gerði armbeygjur og ég veit ekki hvað.

Vaknaði í morgun og mundi eftir verkjatöflunni. Í dag er ég þunn. Það er á mörkunum að ég komist fram úr rúminu.

Nýr vinur

2010-06-08T07:29:00.003Z

Ég fór í veislu síðastliðið föstudagskvöld. Hefði ég átt að vera heima að læra? Kannski. En þegar manneskja sem mér þykir vænt um er nýbúin að verja doktorsritgerðina og er í Stokkhólmi í nokkra daga þá mæti ég. Maður drekkur vatn og fer snemma heim og leggur harðar að sér daginn eftir.

Þetta kvöld kynntist ég nýrri manneskju. Hún er fyrrum samstarfsmaður doktorsins. Við bonduðum yfir ást okkar á skóm. Henni fannst skórnir mínir fínir. Þar sem okkar eini sameiginlegi vinur er fluttur úr borginni voru litlar líkur á að við myndum nokkurn tímann hittast aftur. Báðum fannst það leiðinlegt svo við skiptumst á númerum.

Nú hlakka ég mikið til að klára skólann (er langt komin núna) og hringja í nýju vinkonu mína og drekka kaffi og fara í skóleiðangur. Brúðarskórnir eru dálítið mikið háir og mig bráðvantar mjúka ballerínuskó til vara...

Komin tönn!

2010-06-06T14:49:00.002Z

Ég fann nýja tönn í munninum á sjálfri mér í gær. Þreifaði svo aðeins á gómnum og fann að endajaxlarnir eru farnir að brjótast fram í allar áttir. Enginn virðist snúa eðlilega.

Hmm... getur verið að stressverkirnir sem ég hef fundið í kjálkanum og þrýstingurinn í andlitinu síðustu misseri hafi verið tengdir endajöxlunum og ekki álagi?

Loksins

2010-06-05T10:04:00.003Z

Ég er búin að fatta út á hvað lokaverkefnið mitt gengur!

Flókið

2010-06-04T10:02:00.003Z

Mamma heitir Hulda,
pabbi heitir Fredrik
og Íris heitir...

...STÓR STELPA!

Mæðradagsblómin

2010-06-03T11:15:00.002Z

Takk elsku mamma og pabbi!

2010-06-02T06:22:00.002Z

Þessi sending barst í gær. Hér var haldin mikil súkkulaðiveisla!

Hvað leynist í pakkanum? Fyndnu foreldrar...

Mæðradagurinn var í fyrradag...

2010-06-01T08:10:00.004Z

Mæðradagurinn var haldinn hátíðlegur í fyrradag. Ég fékk fallegan blómvönd frá F og Írisi.

Íris vaknaði í nótt og vildi fá vatn að drekka. Þegar ég teygði mig eftir glasinu tókst mér að velta því niður á gólf og glasið splundraðist í milljón bita. Sem betur fer var það tómt. Ég flutti Írisi yfir í rúmið okkar, ákvað að geyma það að ryksuga fram í fyrramálið og lokaði dyrunum að barnaherberginu. Íris var ekki á því að sofna. Hún var þyrst og það fór illa um hana og var allmennt rellin. Loksins fann hún lausnina: ,,Ég er búin að kúka!"

Þreytt og mjög pirruð mamma gafst upp og við fórum fram í stofu til að skipta um bleyju. Þá sá ég að greyið litla hafði ekki gert í bleyjuna til að komast fram úr bólinu heldur hafði hún gert þetta áður en hún sofnaði um kvöldið og niðurstaðan var illa brenndur bossi. Þegar maður er ekki orðinn þriggja ára er alls ekkert sjálfsagt að maður geti sagt frá því hvar maður finnur til. Ég skammaðist mín.

Við hreinsuðum litla rassinn sem var allt of rauður til að setja á bleyju og lögðum okkur í sófann, hún og ég. Þegar ég lá í sófanum með tvo litla handleggi vafða kringum hálsinn og nefið klesst inn í barnakinn þá sló það mig hversu heppin ég er að mega vera mamma þessarar litlu stelpu. Hún fann til og þurfti hjálp og ég svaraði með geðvonsku. Og svo verðlaunaði hún mig með því að kúra sig niður hjá mér og faðma mig að sér.

Næsta mæðradag verða keyptar sápukúlur bökuð pítsa og svo höldum við uppá það að ég fékk að vera mamma hennar Írisar heilt ár í viðbót.

Gáta dagsins

2010-05-29T18:18:00.002Z

Hvaða dýr hafa börnin á leikskólanum formað úr trjábolnum?

Símtal frá ömmu farmor

2010-05-28T07:51:00.004Z

Amma farmor hringdi í gær. Amma farmor og allar föðursysturnar og föðurbræðurnir voru úti að saga niður eldivið og Íris sniglaðist í kringum þau. Amma farmor gerir sér grein fyrir því að óvenju lítið hefur farið fyrir Írisi síðustu mínúturnar og fer að athuga málið. Þá hafði Íris fundið gamlan varalit og málað bílinn hennar ömmu að innan...

Úti að borða

2010-05-26T07:15:00.003Z

Við F héldum daginn hátíðlegan í gær. Fórum út að borða á veitingastað með útsýni yfir Gamla Stan. Maturinn var góður og starfsfólkið duglegt. Þeim fannst ég ekkert skrítin að vilja fá tvo forrétti og eftirrétt og sleppa aðalréttinum. Kvöldið gat ekki orðið betra.

Það eina sem skyggði á var að F gat ekki hætt að tala um hvað útsýnið væri leiðinlegt og hvað borgin væri skítug og grá. Mér fannst hann vera nöldurseggur. Í lok kvöldsins stóð F upp og skrapp á snyrtinguna. Þegar hann kom til baka stoppaði hann á bakvið stólinn minn, lítur út um gluggann og segir svo: ,,Hulda, prófaðu að setjast í stólinn minn." Ég geri það, lít út og við blasir Slussen í öllu sínu veldi. Á meðan ég hafði setið og horft út yfir fallegasta hluta borgarinnar hafði F. setið og fylgst með skítugustu gatnamótunum/lestarstöðinni í Stokkhólmi.

Spes

2010-05-24T07:59:00.003Z

Ég sit við stofugluggann og vinn með verkefnið. Portið fyrir utan húsið okkar er þröngt og lítið og því sem næst lokað af húsum á alla vegu. Maður þarf að einbeita sér þegar maður bakkar inn í það. Þessi sýn mætti mér eitt sinn þegar ég leit út um gluggann. Það tók vörubílinn næstum klukkutíma að Austin Powera sig út úr sjálfheldunni.

I wanna be the girl who walks in the sun...

2010-05-21T09:00:00.003Z

Mig vantar að komast upp í fjöllin aftur. Þessi mynd var tekin í Tjäktjapasset á Kungsleden í Norður-Svíþjóð.

Sat 12 tíma á bókasafninu í gær. Nú eru bara tvær vikur í ritgerðarskil og hellingur að gera þangað til!

Lítill sigur...

2010-05-19T18:10:00.005Z

Brev till Försäkringskassan:

När jag blev gravid var jag en ung student. Webbsidan med information var inte så tydlig när det gällde min situation så jag ringde er och frågade om vad som gällde. En månadsinkomst på 5500 före skatt är ju svår att leva på. Det rätta svaret hade varit: "Studenter får lägsta nivå men oroa dig inte därtill tillkommer barnbidrag och bostadsbidrag så du hamnar på ungefär samma nivå som vanligt". Efter mycket om och men fick jag prata med en dam som konstaterade att det här borde jag ha tänkt på innan jag gick och blev med barn.

Ni borde tänka på att ni har med människor att göra.

Mvh. Hulda

Svar från Försäkringskassan:

Hej!

Jag kan bara be om ursäkt för det bemötande du verkar ha fått vid din förra kontakt. Självklart så ska vi inte uttrycka oss på detta vis.

Med vänlig hälsning
Försäkringskassan

PQ tónleikar í fyrradag...

2010-05-16T19:43:00.005Z

Fór á tónleika í gær með skólahljómsveitinni sem ég dansaði með einu sinni fyrir löngu síðan. Það er svo gaman að fylgjast með þeim og sjá hlJÓNsveitina blómstra.

Og svo ein gömul mynd...

Hverju mundi þú vilja breyta?

2010-05-14T07:14:00.001Z

Ég var spurð að því um daginn hverju ég mundi vilja breyta í fari mínu. Það var merkilega góð tilfinning þegar ég gerði mér grein fyrir því að ég er ánægð með sjálfa mig eins og ég er.

Rifrildi dagins

2010-05-13T07:51:00.002Z

,,Nei, mamma! Ekki salt í grautinn!"

Kaffi á hverjum morgni

2010-05-12T08:04:00.002Z

Þegar ég flutti til Stokkhólms var mér gefin lítil pressukanna. Fimm árum síðar missti ég könnuna í gólfið og hún brotnaði. Ég grét og hætti að drekka kaffi hér heima. Þar til í síðustu viku að Fredrik kom með gjöf handa mér. Ný og fín bleik pressukanna sem nú á vísan stað á morgunverðarborðinu.

Íris benti á könnuna í morgun og sagði: ,,Mamma elskar kaffi!"

Langar í...

2010-05-10T09:22:00.003Z

Mig langar í kókómjólk og prins póló. Og appelsín. Og kókosbollu og buff úr Kolaportinu. Og eina með öllu og þá sérstaklega remúlaði. Og Lindu-Buff og Bitabæjarsamloku og Trópí og Síríus súkkulaði með rúsínum í og kleinu. Mig bráðvantar eina kleinu núna. Og bakaríssnúð með karamelluglassúr og ristaða beiglu með kanil og rúsínum og smjöri og osti. Og vélarís frá Kjörís - bleikan og hvítan með lúxusdýfu. Mig vantar karamellu Lúxusís. Og Dómínós. Stóra Dómínós kjötveislu. Og kókópöffs. Og kleinuhring.

Mig langar ekkert í kúlusúkk. Ég hata kúlusúkk.

Fengu ekki að kjósa

2010-05-07T08:15:00.003Z

Í Englandi fékk fólk ekki að kjósa. Við síðustu Evrópusambandskosningar í Svíþjóð fjarlægðu starfsmenn kjörstaða kjörseðla litlu flokkanna þar sem að ,,svona vitleysa á ekki við í mikilvægum kosningum".

Í Evrópu heldur maður að allt sé í stakasta lagi. Við kunnum lýðræði. Við fundum upp lýðræði. En fólk gleymir. Maður er svo upptekinn af því að fylgja öllum settum reglum að maður gleymir hvers vegna reglurnar voru settar. Dálítið eins og þegar yfirsetufólk í prófsölum gleymir því að prófin eru haldin til að prófa nemendurna en ekki svo að yfirsetufólk hafi e-ð að gera.

Eftir síðasta prófið mitt í skólanum lenti ég í rifrildi við konu í hlífðarhönskum sem neitaði að telja hversu mörgum blaðsíðum ég skilaði inn. Hún bar sko enga ábyrgð á því að ég skilaði inn jafn mörgum blöðum og hún kvittaði fyrir að hafa móttekið.

Sagan um skóna

2010-05-04T11:21:00.004Z

Í lok febrúar sá ég mynd af skónum á netinu. Þar stóð að skórnir færu í sölu í byrjun mars. Fyrir hádegi fyrsta mars stóð ég í búðinni - tilbúin að kaupa þá. Skórnir voru ekki komnir ennþá.

Eftir að hafa mætt á hverjum degi í heila viku lofaði heimsins besta Annie að hún skildi taka frá par handa mér og gaf mér númerið hjá sér svo að ég gæti hringt á hverjum degi í staðinn fyrir að dröslast niður í bæ í tíma og ótíma. Henni fannst ég ekkert skrítin að bráðnauðsynlega þurfa að kaupa brúðarskóna eins og skot þrátt fyrir að brúðkaupið ekki haldið fyrr en í fyrsta lagi næsta sumar. Sama dag fór ég og keypti fallegan skókassa til að geyma skóna í.

Þar sem ekkert bólaði á skónum sá ég mig knúna að senda póst á ritstjórnina á netsíðunni sem upphaflega hafði birt auglýsingu um skóna. Stína var fljót að svara og sagði að skórnir væru væntanlegir eftir helgi.

Á föstudegi eftir helgi koma svo góðu fréttirnar frá Annie. Skórnir eru komnir í hús! Þennan föstudag hélt ég partí fyrir hundrað manns. Ég hafði engan tíma til að kaupa skóna en lét mig hafa það og skellti mér í bæinn með 55L bakpoka á bakinu og þriggja metra langt plaggat og tvo svarta ruslapoka fulla af veisludóti í höndunum. Annie var ekki við akkúrat þá en hún hafði staðið við orð sín og tekið frá parið svo brúðarskór í stærð 37 fengu að fara með í partíið. Það var ekki fyrr en á laugardagskvöldið sem mér gafst tími til að máta skóna og ég uppgötvaði að tærnar á mér höfðu sko ekkert stækkað á meðgöngunni. Númer 37 var of stórt!

Sunnudagsmorgunn: Ég hendist í bæinn. Annie var að vinna og fékk áfall. Var ég í alvöru að koma og skila skónum sem ég hafði svo mikið fyrir að nálgast? Að sjálfsögðu var nóg til af skóm svo nokkrum mínútum seinna var ég komin með rétt par.

Á mánudag fæ ég póst frá Stínu. Hún vildi láta mig vita að nú væri hægt að kaupa skóna á netinu líka. Þar að auki langaði hana að skrifa um mig á síðunni hjá þeim.

Síðan hafa liðið nokkrir mánuðir og Stína virðist hafa fundið betra ritgerðarefni. En ég er komin með skóna mína. Það mátti ekki tæpara standa því nú eru ekki nema nokkrir mánuðir í að við þurfum að fara að ákveða hvort við ætlum að gifta okkur næsta eða þar næsta sumar. Það væri svosem ágætt líka að ákveða í hvaða landi við látum slag standa...

Þegar kötturinn er úti...

2010-04-30T14:49:00.002Z

dansa mýsnar á borðum...

Þannig er það orðað í Svíþjóð. Mér virðist fyrirmunað að muna íslenska orðtakið sem passar inn hér. Litla stýrið er í heimsókn hjá ömmu í Falköping og við nýttum tækifærið og fengum okkur bjór með matnum.

Brúðarskórnir

2010-04-29T12:33:00.000Z

Vöfflujárnið og tevatnið...

2010-04-28T07:04:00.001Z

Í gær lærði ég að maður á ekki að hella sjóðandi tevatni á heitt vöfflujárn. Vöfflublandan á heima í vöfflujárninu en tevatnið í tebollanum.

Laugardagsmorgunn

2010-03-06T06:11:00.002Z

Það er dálítið spes tilfinning að sitja við tölvuna fyrir klukkan sjö á laugardagsmorgni. Íris og Fredrik sofa bæði og ég gæli við hugmyndina að fá mér sneið af gráfíkjutertu í morgunmat.

Hmm...te og terta og Matlab... gæti það verið betra?

............
kl.07.47 - Sneiðin var skorin, Matlab var kominn í gang og það vantaði bara tebollan. Þá vaknaði Íris.

Að brjóta reglur um hegðun í almennu rými

2010-03-04T08:44:00.003Z

Ég nota sjaldan vasadiskó. Ekki það að græjurnar vanti. Ég á heimsins flottustu heyrnartól (Scullcandy Titanium Speaker) í sama lit og bleiki Nanóinn minn. Vandamálið liggur í því að ég get ekki setið kjurr þegar ég hlusta á tónlist.

Núna sit ég uppi í skóla í sal fullum af fólki og hlusta á Papana syngja um að drekka Jameson. Það eina sem mig langar að gera akkúrat núna er að slæda fram ganginn með Luftgitarr og öllu tilheyrandi. Tónlist gerir það að verkum að venjulegar reglur um almenn samskipti kæfa mig. Ég verð svo meðvituð um allt skemmtilegt sem er bannað. Fóki þætti ekkert skemmtilegt ef ég skellti mér í dans. Stemmningin yrði væntanlega dálítið þrúguð. "Hvernig á maður að bregðast við? Hún er öðruvísi... gah!"

Þess vegna veit ég ekkert betra en að rokka með Írisi minni á stofugólfinu. Við setjum útvarpið í botn og hoppum og snúum okkur í hringi og hristum alla skanka. Hamingjan í augum dóttur minnar þegar mamma er skemmtileg er engu lík. Og svo man ég að það eru ekki svo mörg ár í að hún verður of stór, að mamma hættir að vera skemmtileg og verður vandræðaleg. Ég ætla að vera dugleg að dansa með henni þangað til...

Skítt með spítalann

2010-02-26T08:42:00.000Z

Nú erum við heima með hita!

Skítt með skólann

2010-02-24T07:54:00.001Z

Nú förum við upp á spítala í staðinn og fáum almennilegt púst...

Snjór

2010-02-22T09:27:00.003Z

Fyrir ári síðan var ég síðustu jólaprófunum. Svo tók ég síðasta prófið í maí og skilaði inn síðasta verkefninu. Svo var ég með 270 einingar. Mig vantar 30 í viðbót. Þessar 30 kallast lokaverkefni. Það hefur gengið hægt að klára.

Ástæðan er ekkert sérstaklega flókin. Á milli þess sem ég mæti í skólan hef ég eitt mánuði í einangrun með lítið barn sem þurfti að fara í hjartaþræðingu, mánuði í að jafna mig eftir það. Nokkrar vikur fóru í handleggsbrotinn hnoðra og um það bil milljón vikur hafa farið í kvef og svefnlausar hóstanætur.

Um jólin tókum við okkur frí. Við byrjuðum á helgarfríi á hótel Glym... mæli með því. Sérstaklega kósí verður helgin ef maður tekur af sparifénu þegar lokaverkefnið er farið að dragast á langinn og námslánin búin. Fátt sem jafnast á við það að laumast út í pott eftir humar og lambafilé í desember og þremur mínusgráðum og slökkva öll ljós í kringum pottinn og horfa á stjörnurnar. Magnað.

Við sváfum um jólin og hvíldum okkur og átum mat og nammi og gerðum ekkert sérstaklega margt. Um jólin urðum við frísk. Og fyrstu vikurnar á nýju ári vorum við þokkalega frísk. Ég er ekkert sérstaklega frísk lengur en nógu til að verkefnið miðast áfram.

Í dag er kallt í Stokkhólmi. Lestarkerfið er í klessu, bremsuklossar frjósa svo lestarnar missa af stoppum því þær slæda framhjá og snóskaflinn fyrir utan gluggan er orðinn hærri en eplatréð. Verð að játa að mér finnst þetta dálítið kósí. Frostið bítur í kinnarnar og heitir drykkir bragðast betur en vanalega.

Um næstu helgi ætlum við í vetrarferð út í Skerjagarð. Við göngum yfir ísinn út í eyju og eyðum helginni í köldu húsi og heitu gufubaði með góðum félagsskap og mat. Allar leiðslur eru frosnar svo klósettið er hola í snjónum á bak við upphengt lak. Vatn verðum við að taka með okkur í flöskum. Þetta er önnur tilraun að komast með. Síðast urðum við að hætta við á síðustu stundu því Íris var á mörkunum að þurfa hjálp með öndun og það er ákveðið öryggi falið í því að vita að maður geti hratt komist undir læknishendur. Úti í skerjagarðinum þarf maður að hringja á þyrlu...

Síðasta önnin í skólanum

2008-11-11T08:12:00.006Z

Bráðum kemur desember. Þá fer ég í síðustu jólaprófin mín hér í KTH. Það er ágætt því þetta fer að verða komið gott. Nú þarf ég bara að finna mér lokaverkefni fyrir vorið og svo verð ég vonandi komin með masterinn í lok sumars.

Gleðilega hátíð!

2007-12-14T20:09:00.001Z